روحي مراح الريح يوم راح ماعاد
روحي ياحلوة روحة مقيط ورشاه
عرفي معك في ماضي الايام لاعاد
أقفى عسى سود الليالي تقفاه
أخير من لاماك يازين الأبعاد
ياجار خل كلاً تقفي مطاياه
ياجار عما فات ماني بنشاد
طبيعتي في مقدم العمر وأتلاه
ياجار تجمعنا بك أيام الاعياد
بأعيانك تشاهد كتابك وتقراه
لاعادت الرفقة والانجاب لاعاد
ولاعاد زرعً عام الاول زرعناه
كم جار وده يصيد ياجار وأنصاد
حط البديل النور وجهه مقفاه
عن العرب فيهم مقيمً وشداد
ماكتب للمخلوق صابه ولاأخطاه
ربعي ياأهل قرى قديمين الأمجاد
قال المثل من جاك بالعلم وداه
أهل القلوب البيض وصخاف الاكباد
تبدي العشرة على الوجة والجاه
الله خلق في الناس سادات وأسياد
رواسي مثل القصور المبناة
شّتت الأنواء بين صادر ووراد
واللي غدا وأخطى السنع مافقدناه
مثل الرواوي بين مايح وجباد
سبحان من حط الملا أصحاب وعداه
أشيل هم مقدر أحصي له عداد
متمركزا بين الضلوع المحناه
أرعى هجوس تقبل أفراد وأضماد
منها ماأعرف أيش ربعي أصحاب وعداه
عندي لصدق أقوالي أحكام وأسناد
يبدي القمر ويغيب والشمس تقفاه
الصدق له مدخل ومصدر وميراد
والسيل مايجري مع غير مجراه
يبدي بها البادي على روس الاشهاد
والعلم الابيض يعرف أقصاه وأدناه
أبطلب الله يقتفي الغيم رعاد
ينبت غصون الحي والميت أحياه
تنبت زهور الورد والسيل ينقاد
مثل الخواتم في كفوف المخباه
ليست هناك تعليقات:
إرسال تعليق