أنا شاعر ومن قدلي ثلاث سنين ماغنيت
تركت الشعر يوم شفته مع العربان لعبوبه
سمحت وشمت يوم شفته يساق مشمت تشميت
نويت بالاستقالة ياحمد والتوبة التوبة
تحمل للمذله وانطرح مابين حي وميت
عيونه من مضاريب ابعض الشعار محجوبه
محطمة المشاعر والنتيجة وين رحت وجيت
ميوعة هرج كنه هرج محبوباً لمحبوبه
يحط البيت لاكنه مايدري كيف يبني البيت
يحرف في القواعد واصبحت الاعراف مقلوبة
حصل للشعر منه نكبة يوم أخلف التوقيت
تخبط في الادب واصبح الادب يشكي من اسلوبه
يصيح وينتخي باللي على البيداء بنوا له صيت
وفاهم تنشره الاحداث غالبةً ومغلوبه
رجاجيل المروه ماتشتت فكرهم تشتيت
مقام الشعر منهم حافظاً حقه وماجوبه
يعدون الحقايق والحقايق ماتحجب البيت
على غير الحقيقة ما عباد الله بمغصوبه
نوادر عصرهم والعفو في التقصير ماعديت
اساميهم تبان بصفحة التاريخ مكتوبة
أصلي وأطلب الله في صلاتي كل ماصليت
يعوض ماكله ياخالد الفيصل ومشروبه
ليست هناك تعليقات:
إرسال تعليق