أنا البارحة يوم كل طرفً خذاه الطيف
خذا الهم فكري كل قطراً ينوي به
تعذبت واتعبت القدم يامبارك سيف
مايدري القدم وين المقادير ترمي به
على ذكريات اهل الوفاء مكرمين الضيف
اشوف الهدف قدام وارميه واصيبه
رجالاً تشرفني مواقيفهم تشريف
هل المجد والناموس والعز والطيبة
عصى العز ستر وجيههم في الشتاء والصيف
ولدهم يشيب والجمايل مكاسيبه
ذراء اللي يبي منها الذراء والزمان مخيف
اهل سربتاً تعطي المسيّر مواجيبه
يحب المعالي من خذا شارة التهديف
وفاء الجار عند اطيب عياله يوصي به
عذابي يابومشعل لاعديت راس منيف
رقيت المنيف الله لاسقي مذبي به
سرينا الليال الساحقة والطريق كليف
تكود ارضنا للي يصل العلم ويجيبه
اخفي محابيل الدهر والزمان مخيف
وانا اعرف قمر مبدأ الهلال ومغاييبه
لاشفت المزاج اللي يوافق مزاج خليف
أباشوم عنه وتشرب الماء دغاليبه
مقادير ياقلباً هبته الهموم اصخيف
برته وبرك مثل البعير لقصاصيبه
احسب الجداول الاربعه واحذف واضيف
هقاوي الخفوق اللي تِلاحق مشاهيبه
هواي وطموحاتي تعانق هوا ابن غديف
يارب انك تعطي كل شخصاً مطاليبه
طرالي واخي مهدي الحبابي يمثل هيف
أشيد شراعي بين قحطان وعتيبه
ياطيب الفتى اللي اسمه غنياً عن التعريف
على قول تحمى لحية الرجل أشانيبه
انا دارياً خط الحديثة يمر طريف
يغاب الولد ويعود لو طول الغيبة
انا ويش ابي بسويسرا وايش ابي بجنيف
مابي الا الفضاء اللي خالياً عاويا ذيبه
قفار الديار الخالية رغبتي والكيف
خضار البختري والنفل في مجاذيبه
ابي البعد من هوقن وريكسن حفيد ستيف
ابو جون وابوستيف وشرنك والخيبه
مايدراء المزا الرجال لاقلت له ياحيف
مبادئ وقار الوجه الابيض ماتدري به
يقولو وش يقولون ماني لهم بوليف
لو الكل منهم يجمع اللول ويجيبه
انا أعرف عباد الله فيهم قوي وضعيف
تطير الطيور وكل طير ومخاليبه
غرابيل ياوقتا تقفاه عج وشيف
دفنه الثرى ماباقي الا تجاريبه
خلاف الصبا ياحول راحت لحانا ليف
عسى رحمتك ياسامع النمل ودبيبه
انا يامبارك طرقياً زايراً ومعيف
ياروحي يانجد الله ينصر مناصيبه
دياراً يقام العدل فيها بحد السيف
بها المسجد اللي أمة محمد تصلي به
دياراً غلاها اكبر من الشرح والتوصيف
على المسلم اللي طاعة الله مكاسيبه
انا اعرف نبات ارض الحيا افضل من ارض الريف
على قولة الرجال يَعرف معازيبه
ليست هناك تعليقات:
إرسال تعليق