مرحبا واهلين بقدوم المحافظ في الردايف
عند ابن فرحان احيي بالضيوف وبعزباها
في قدومك يالامير اختار من الهرج الطرايف
حكمة يفخر بها اللي قالها واللي قراها
أمطر الوسمي هطل مع جيتك واسقى المصايف
تلعب الورقاء على البحر الطويل أجمل غناها
فرصةً تجمع رجال الجود مافيها حسايف
كلاً رجلاً تسطر في سجله من غلاها
فيك ياسليمان من والدك واجدادك وصايف
آل جبرين الكرام اللي يشرفنا وفاها
الرجال اللي لفعل الطيب والجودة ولايف
طيبها مشهود من ماضي السنين ومنتهاها
من بني زيد الذراء تلقى الذراء لاصرت خايف
العوارف الاوفياء والدلو يجذبها رشاها
في قرارت نجد ترسي مثل شامخة النوايف
في الديار اللي شمال اعنان واللي من وراها
درع جنبي تاج راسي لارتخى الجدر المهايف
زودها زودي لمن الواجبة دارت رحاها
نحتسي للطايلة والله يبشر بالخلايف
لو مكاسبنا غدا لضيوفنا ولاعشاها
من عوايدنا نمد اليد وأنفسنا عفايف
في القسى واللين مايكسي الوجيه الاحياها
في المواقف تعرف ارجال الثقال من الخفايف
وأن صفت الايام كلاً جر سمحاء من خباها
ماعلى الرجال يابو زيد في الجزلة كلايف
والضعيفة يخسر اللي باعها واللي شراها
الله يمناّ بأمان الدين في كل الطوايف
في ذراء حكم السعود اللي يذرينا ذراها
بعد أمان الله دامو الأربعة ماني بخايف
يالله ياربً تحقق نصرها على عداها
الملك فهد وعبدالله وابوخالد ونايف
وشققاها والأسود أحفادها الله يحماها
أسرة قامت كتاب الله هدفها والوظايف
الله يجمعها على الطاعة ولاتشقر عصاها
والوطن ياربي انك تمنّه من كل حايف
العقارب سمها بذيولها ولاقراها
من طمع فينا لمنّه حاف شاف وراح عايف
ياهل التوحيد ماللعين كحل الاعماها
أستعدوا للمواجه في المديد وفي النكايف
واطلوا الجرباء الين الجرب تبرى من طلاها
الخبول مسببت الارهاب يامال التلايف
زمرة الشيطان تكشف سترها تبغى عراها
كيف صاروا في نحر شيطانهم مثل العسايف
والبصاير عمي ماتعرف قداها من خطاها
اوطنيتهم توطي روسهم مثل الهدايف
منكرة الاحسان شكل وجيهها كنه قفاها
الوطن يامن بنا وشهودنا بيض الصحايف
والرجال اللي ماتحمى حدها تحلق لحاها
ليست هناك تعليقات:
إرسال تعليق