يامحمد بن سعيد الله يعلم وش لون حالي
لي سبوعً اقتلب كني على حامي المليله
‍
ياولد من يقطع الفرجه على الحف المصالي
ينثني في الريب لاقفى خليلاً من خليله
‍
كامل الميزات اخو عيده ولله الكمالي
يم نجايبنا ظهور الجيش والقبأ الاصيله
‍
انشدوا عنه سيوف الهند وحداد السلالي
وام تاجين القصيرة وام تاجين الطويله
‍
عالياً مجناه جدان وخواله والعمامي
من رجال ترد حوض الموت بسيوفً صقيله
‍
ساس شجعان توقف مثل راسية الجبالي
من بني عباد لاشتبت مثل هية غليله
‍
نوب افكر في الجنوب ونوب افكر في الشمالي
جعلها تكفير يارب الملا منجي دخيله
‍
يالله اللي فيك واليك اعتمادي واتكالي
الاله الاانت نلجاء في الخفيفه والثقيله
‍
يشهد الله اني تعبت وقل حيلي واحتيالي
مابقى في الحال حيل ولابقى في اليد حيله
‍
الدهر كله تجاريب ونزولاً وارتحالي
متنك احياناً يوطي الحمل واحياناً يشيله
‍
اشهد ان الصدق له نوراً مثل نور الهلالي
والكذاب بعكس ذلك في الوزن ينقص حصيله
‍
بازهم الله الواحد المعبود ثم بزهم خوالي
يطرقون الباب حتى ينطفي النار وشعيله
‍
ياهل الوقفات لاركب الرشا فوق المحالي
درع جنبي يالحباب اهل المواقيف الاصيله
‍
من رجاجيلاً توقف في الخفاف وفي الثقالي
من عيال مضيم لاناش الزند خشم الفتيله
‍
ياهل الميقاف لاشتب للهوب الحرب صالي
افزعوا لي ياشيوخ القوم واعيان القبيله
‍
خبر اصحاب السمو ياسيف واصحاب المعالي
من فزع لي والله دين الشرع ماضيع جميله
‍
والقعيطي مانبي منه جواب ولاسؤالي ‍
له سبيل ولي سبيل وكل واحد في سبيله