صرخة من تحت الأرض
يالله ياللي تعلم الحيلان ترحم حالي
                  لانزلت بحفرة مطوية ملحودة
مابقى من مااملكه في وسعي الا اعمالي
                 انقفل باب الخروج ولابقا لي عوده
رحمتك لاصرت بين اجابه وسؤالي
                   ضيف وانت ضيافتك مسموعة مشهودة
اسالك ياربنا اللي في السماء متعالي
                  جود خلقه مايعادل لفحة من جوده
اتجاوز عن خطاي وسيتي واهمالي
                  يامغيث المستغيث اللي وقف مجهوده
ماسجدنا الالوجهك رهبة واجلالي
                  ماخذتنا زعزعة خيل ابرهه واجنوده
اقني النار وعذاب القبر والاهوالي
                  طالبك يالله لاتجعل طلبتي مردوده
المجيب المستعان المعطي المتعالي
                  لااله الملك ملكه والحدود حدوده
لااله الا الله انت رب اسلافنا والتالي
                  كل ابو امتنا عبادك رصة مرصوده
عابدين موحدين القول بالافعالي
                باثر سيدنا محمد ونعبد معبوده
انجنا يارب عفوك من لهيب الصالي
               نستجيرك من كدر حمر الزمان وسوده
تحت ظل ظلال عرشك ظلنا بظلالي
               لب دعواتنا بجودك ياعظيم الجوده
الوجيه البيض يبقى عزها متوالي
               عصبة والشره مايخلف طريق جدوده
والعنيد اللي يجسد بالهبال هبالي
                مادرا ان ايام عمره حسبة معدوده
قدرة الله كان قصر العمر ولاطالي
               واردين حياضها وحياضنا ماروده
ماعلى الرحمن في صرم النفوس اشكالي
                  تبتدي ثم تنتهي في ساعة ماعودة
ياصلاة الله على وجه الرسول الغالي
                  والثناء للي هدانا السنة المحموده