هذة القصيدة من / فرحان بن حمد بن عوضان الحبابي في الشيخ / مسفر بن سعيد الحبابي
لوفاءه في جميع المراجل




أبدع القاف بأحسن حال لين اعتليته                 ابدعه ماخذيته من سطور الــــــمجلة
ياحمد عقب اللي غاب يوم احتريته                   يحسب اني قصير الشبر في حاجتله
مادرى اني مع اهل الطيب بيتي بنيته               باني بيت عز والنشـــــــــــامى تـــدله
ابن عماً لما ضاقت علي مالقيته                       رفقة الذيب سرحـــــــــــــان ولارفقتلـه
فاعل الطيب عندي لو نسى مانسيته                 والله لروح واسلم عليـــــــــــــه بمحـــله
مثل مسفر بن سعيد اللي وفاء يوم جيته             حقه البيض في روس الجبال المطله
التراحيب ترفع فاتحاً باب بيته                         وقولتاً أرحبوا يامرحبـــــــــــا رايتــْله
ماهو بيتقي لما عنيت ونصيته                          جعل من يتقي لاجاء لزومه فد لــــه
مطلق حجاج متواضع لامنك لفيته                     شال منك الهموم بمجلس ماتملــــه
والله أني فخوراً بالحبابي وصيته                      صيته اللي مع أهل الطيب في نجد كله
كل ماجاء مجاله في المجالس واوحيته                  ترتفع غترتي لما حصل طاريـــــله
لو برد الثناء للشيخ مسفر ماأوفيته                      لانه عندي وفي والوفاء عادتلــــــه

                                            كلنا قد المواقيف


يالله ياللي منزل الحمد فاتحة الكتاب               وحط في القران سورة سليمان وسبأ
ان توفق مسفر بن سعيد في هالانتخاب             وان تفرح كل رجال يفرحه النبأ
لانه سجل بسم قحطان ماحط الحباب               وشيد البيت المروبع وقدم مرحبا
مابقى الاندعم الوضع شيبان وشباب                 وكلنا قد المواقيف واللاش يهبأ
مثل ذا الموضوع مابه جدال ولاعتاب                  بكره احتاجك وتحتاج وثاني يبأ
نبي وقفة صامل ماتجي مثل السراب                 مانبي حضر وموجود والفعل يغبا
يفهم الموضوع رجل يحسب للصعاب                  مايجرب بالموقف رجل مجربا
رجل ماله ربع يصبر على مر العذاب                   ودار مابه ربع ياعل يرعاه الدبا
ورجل ماله ربع سيف لكن ماله نصاب                  ورجل ربعه معه يضرب بسيف له شبا
ومثل ذا موضوع فالشان وحد والجناب                  والغباء عكس الذكاء واذكاء عكس الغبا
ان تجمعنا غدينا مثل حمر الهضاب                     وان تفرقنا غدينا مثل شعر الضباء
نبي لافرزت الاصاويت نعجب بالعجاب                  مانبيها مثل ما قيل ثارت في الخبا
الحكومة حطت اصوات ماهي باغتصاب                كل رجال وحظه حسب مايكسبا
دولة تحكم بشرع تقص به الرقاب                         وماتخاشي للتطرف ولاترضى الربا



الشاعر/ سالم بن محمد الحواصله

                                         اشهد معي يامشعلي



يالله ياللي فوق الأكتاف ثبت أملكان                للكلام اللي تقوله تقوم تسجلي
ياكريم الوجه ياللي تنشي بالغشان                 بأمرك وقدرتك تنشي الموون وتهملي
حكمتك حطت ديانات وانت المستعان                في المذاهب الاربعه شافعي والحنبلي
انك تامرني على الحق والحق المبان                  مثل مايطلع على الليل صبح وينجلي
يامشاعر عبري وارسليها للسان                      لان العاقل لو تجاهلتها يشره علي
وشرهة اهل الطيب عندي لها قدر ومكان             من بعيد القوم والاقريب من هلي
اشهد ان الطيب ماله مكان ولازمان                   وكان قولي صح فشهد معي يالمشعلي
تكسبه خطلان الايدي ويتركه الجبان                  مادرئ ان الرجل يكفيه في الشرهة طلي
بيض الله وجه من حط بيت لقحطان                    شيده باسم قحطان ومحله معتلي
وان نشد توي عن اسمه فلان ابن فلان                 مسفر بن سعيد حبابي عبدلي
مزبن اللي حده الوقت وظروف الزمان                   وعزوة اللي هم بعداه والمخرج ملي
الحباب عضودنا لارتخاء رخو البطان                     عزوة بين العرب مثل كوكب زحلي
وحن لكم وانتم لنا لو يجي شد العنان                     عزوة وحدة وربع وانا لك وانت لي
دام عبدالله وحنا سواء مثل الاخوان                         احتزم للقوم ولاعليك ولا علي
حن عيال مضيم ومروية حد السنان                         ومثل حمس البن نقلى معادينا قلي
وحن بدعنا جيرة تعطي الخائف الامان                     لاذكرها الخائف المضطهد نام وسلي
السنة الاولى متيه وندبلها كمان                              والسنة الاخرى قصير يشد وينزلي
والقبائل مثلنا لو تهين او لو تهان                            من عصر عاد وثمود وابو بكر وعلي






الشاعر/ سالم بن محمد الحواصله 

                                              بسم الله الرحمن الرحيم


                                           تكفون ياقحطان


يالله ياللي لك عبادك يناجون                       خوف ورجا ولك الدعاء يرفعونه
يرجون عفوك ياكريم ويصلون                       خمس الفروض ووقتها يحفظونه
ولرضاك يدون الزكاة ويصومون                    صاموا وقاموا والنذر يخلصونه
وان استطاعوا حج بيتك يحجون                   وفودهم من كل ارض يجيونه
يامكون الكون المهيمن على الكون                 يامن يرى خلقه وهم مايرونه
انت الذي تعلم خفا كل مكنون                      وعلمك جميع الخلق مايعلمونه
يامخرج من بطن النون ذا النون                   بامرك وامرك بين كافه ونونه
ويامهلك فرعون وجنود فرعون                       وموسى نصرته واللي يناصرونه
تجعل لنا التوفيق والفوز مضمون                   والآدمي يالله يحسن ظنونه
والأخرة غاية لها الناس يسعون                     وباقي الدنيا متاع ومئونه
وأرفع ندا وأنا فخور وممنون                        عسى الرجال اهل الوفاء يسمعونه
ياهل الحمية شاركوا لاتخلون                       الصوت حر وبالمجالس مرونه
وولاة الامر يشجعون ويعينون                       واللي بقى من باقي تكملونه
وين الرجال اللي بالاسماء يعدون                  اللي لنا وقت اللزوم ومخزونه
اليوم هذا يومكم لاتغيبون                           ياعزوة اللي عزوته ماتخونه
تكفون ياقحطان تكفون تكفون                      تكفون سووا كل ماتقدرونه
شوفوا سوايا غيرنا وش يسون                      كل وقف وراء رفيقه ودونه
قوموا مع ابو فيصل ولاتوانون                       الراس مايشيله الا متونه
مسفر ترشح باسم قحطان ويمون                  والجهد والمجهود تستاهلونه
فوزه لنا فوز وعونه لنا عون                           والعز عز والتخاذل مهونه
والفوز بالتصويت والدعم مرهون                    والواجب انكم كلكم تدعمونه
الكل بالتصويت ملزم ومديون                         وش عذركم وش عادكم تحترونه
نبغى من اصوات الرجاجيل مليون                   مليون صوت بسمه تسجلونه
الوقت مثل السيف وانتم تعرفون                       غير الحقوا من الوقت ماتلحقونه
بكره الى من اعلن الفوز تدرون                        ماهي نتيجة موقف تاقفونه
اما حسمنا الفوز وابليس ملعون                       والا انهزمنا والنفوس مغبونه

الشاعر/ عبدالله بن مبارك المشعلي 

                                                بسم الله الرحمن الرحيم


                ( يعيش ابو فيصل )



يالله ياللي للمخاليـــــق معبـــــــود                  يالواحد اللي مالك اشباه وانداد
منشي السحاب اللي به بروق ورعود              ينوض بـــــــرقه ويتـــــلاه رعــاد
اسالك التوفيق في كـــــــــل مـــارود               واسترجل أبيات بها خاطري جاد
مضمونها الترحيب والشكر ممدود                 للي طموحاته لها أبعاد وأبعـــــاد
بسمه أرحب عد ماهــــــــــبت النود                ترحيبة المتحمس الصادق الجاد
ترحيبة فاحت رياحـــــــــــين وورود               واصفى من الشهد المصفى للاكباد
ويعيش ( ابوفيصل) راعي العز والجود          اللي على مواقف الطيب معتــــــاد
اعتز وافخـــــــر به ومن زوده أزود                سعد الرفيق اللي يحطه له سناد
يرقى سنود وياخذ المدح والفــود                  اثبت وجوده بين طلقين الايـــــــاد
مع الرجال اللي يعدون معدود                     ماهوب لاجات المواجيب حـــــواد
والمرجلة مجالها ماله حــدود                    كل يقول انه راعي سرج وشــــــــداد
وان رد علم بين ناشد ومنشود                 صدق النبأ ينشر على روس الاشهاد
فعل الحبابي تو الاعيان مشهود              البيت شيـــــد والمســــايير وفـــــــاد
والبن الاشقر والشحم وازرق العود            قال النشاما عند كســــاب الامجاد
وحنا ليا قمنا له زنود وعضود                 بني مضيم اللي يضدون الاضــداد
ومن قال عبدالله وقحطان وابن هود           اصل العرب واسياد من عصر الاجداد
يوم القبايل بين حاوي ومردود                   صالوا وجالوا واحمر الموت جــــــلاد
وان ثار من بين الحقيقين بارود                  من حافهم ثم شافهم راح ماعــــاد
والحمدلله عقب طارد ومطرود                    اليوم في ظل الفهد والامن ســـــاد
وسيف العداله بارع الحد مجرود               يقطع رقاب اهل التطرف والافساد


الشاعر/ عبدالله بن مبارك المشعلي 

هذة القصيدة مهداه الى الشيخ / مسفر بن سعيد بن فرحان القحطاني       حفظه الله ورعاه



الا يالله يااللي تعلم النيات يامعبود                                
                                         نسالك في نهار الملتقى عفواً وغفرانـــــــي
سلامي والتحية عد ماهبت هبوب النود                        
                                      وعداد من صام واللي طاف بالكعبة والاركاني
تحياتي وتقديري لكم ياعريب أجدود                          
                                      علومك بالوفاء والطيب ترفع روس قحطانـــــي
الا ياكاسب المدح والناموس ماهو يكسب المنقود          
                                        مسكت المركز الاول ماهو بالمركز الثانـــــي
يشرفنا فرحكم جعلكم دايم بعز وزود            
                                      ويرفع روسنا فعل الرجال اللي لهم شانــــــي
اقول المدح فيما يستحقه وابذل المجهود                  
                                     ولاعدوا اهل الناموس تلقى اسمه وعنوانـــــــي
واحب الصدق واهل الصدق واعرض عن قلال الفود          
                                        بيوت الشـــــعر للعـــْراف نوزنها بميزانـــــي
عسى ياشيخ تبقي بالسعاده دايم موجود                    
                                     عريب الجــد وافي العـــد من خال وجدانــــــي
وربعك ربعنا سقم العد لاغيم البـــارود                      
                                       اهل العادات واهل المعرفــــه ذربين الايمانـــي
أنـا يامسندي ناصيك من ضيم الدهر محدود          
                                        على الله ثم عليك اشكي عنا وقت تحدانـــــي
عراقيل الدهر حطت برجلي واليدين قيود                
                                       اريد المشي امــــــام غير سو الحظ عدانــــــي
ترا نور القمر يامسندي يجلي الليال السود              
                                      وفزعتكم لنا ترســـــم لنا نور وبرهانـــــــــــي
عسى الله يديم عزك ياعريب الساس راع الجود          
                                     وتبقــــى دايم ذخراً لنــــــا في كل الازمـــاني
الا يافزعة المضيوم ياللي تنفع المضهود                        
                                      عساك تشيل حمل ضامني من فوق الامتاني
مشينا بالركايب لين وصلت دربها المسدود                  
                                      وجار الحمل واحرجنا وصرت اليوم حيرانــــي
أنـا فيك اتعشم والامل فيكم بدون حدود              
                                       وغيرك والله ماننــــصاه من الاقصــين والداني
وانا لو جيت غيرك شفت بابه مغلق ومردود            
                                        ويمك قادني شوقــي وتصميمي ووجدانـــــي
واثني لك تحياتي عدد ماهل وبل رعود                  
                                        واريد المعذرة لي صار لي في القول نقصاني



الشاعر/ حمد عائض محمد القحطاني

هذة القصيدة مسندة الى الخال العزيز الشاعر / مسفر بن سعيد الحبابي مع أجل التحايا وفالق التقدير والاحترام.


قال الذي ساقه لبدع الطواريق                       هجوس شعرً في ضميره تحده
نسّقتها على ابيض الطرس تنسيق                 ويسوقها طيب يذعذع بنـــــــده
سيل القوافي لو حدته المضاييق                     فيض مع واديه ماش يـــــــرده
هيضت قاف شاقني له تشاويق                     والشوق كله لي لفاني مــــرده
قم يانديبي جعل دربك توافيق                        واركب على اللي ماشرى للمكده
شاص جديدًمنوة للسواويق                           يرخص على شانه ريال نعـــــده
يشبه لحر مطلقته المسابيق                           من كف صقار على الجول هـده
لي صفر العداد صعب الملاحيق                     واللي بطبلونه لـــــزوم يعــــــده
من الحفيز مطلعه مابعد سيق                         اركب عليه ودق سلفه وقـــــده
مندوب تله من بطن عرقه شريق                      وللعاصمه وصل جوابـــي ووده
نصه لقرم مجلسه للمطاليق                            منصى الذي ضامه زمانه وضده
خالي رعا الوقفات لي ذبل الريق                      يلقاك بالترحيب قـــــــدر وموده
سلّم عليه اعداد نبت الزماليق                          في خايع خلو كسى النبت خده
وثن السلام ودقق العلم تدقيق                          وليا جلست اعطه جوابي ومده
حنا لفزعاته ونفعه مشافيق                             في الماقف اللي مالنا منه صده
سقنا العزوم وذببتنا الشواهيق                        وكٍل بماقف بوه ميـــــــراث جده
لاجله قبلت الموقف المحرج الضيق                    وكل يبرهن موقفه فعــــل يـــــده
نصبر على الدنيا ومر المذاويق                        وحبل الرجا في جود ربي نمده
الله يجودنا عراه المواثيق                                وجود العرب من ربها تستمده
لو كل رجال ينقل الحمل ويطيق                        كان الجمل قد دار حوله بشده
لكن مفاتيح القفول المغاليق                             عند الذي مفتاح رزقي بيـــــده
نذخر فواعيس الرجال المطاليق                         ذخر بعد ربي على كل شــــده
برق بعلمي يابو سعيد تبريق                           وماكان في جاهك ومجهودك أده
ماكل رجال يفك المزانيق                                 وشرواك لي جا في لزوم يسده
الايام حدتني بحد المفاتيق                              وسيف المواجيب ايحداني بحده
أخفيت سري عن جميع المخاليق                       العلم مايشـــرح على غير قــــده
نبذل سبب غرب الدير والتشاريق                       والمستحي على القصا مانحده
أن كان حظي راقد عله يفـيق                            ولايعد التالي العـــــمر عـــــــده
وختامها يالله بعد التشافيق                              تدلنا للخـــــير والشـــــــر لــده
وصلاة ربي عد ماللنحر سيق                           على النبي سنته مستـــــــــوده

ابنك الشاعر / مترك بن فلاح العاجزه

هذة القصيده مهداه للشيخ / مسفر بن سعيد بن فرحان الحبابي وتحمل في طياتها الود والتقدير

احتزم يافكر واحضر من من ابيوت القصيد                      مايبرهج خاطر العمس ويحل العقود
وامدح اللي لبن عمه جعله الــلــه رصيـــد                          وان لفاه الاجنبي شاف منه كل زود  
هيلع بالجود لا مد ما مـــــد الزهيــــــــــد                           هيلع لضيف يقعر معا الحايل قعود
وليت عنده يا الاجاويد ماعند الوليــــــــــد                           يوم غيره جعل مالِ يجمع في نـــفود
واشهد انه في المعاند رعا راس عنيـــــــد                            واشهد انه محزم الضيق لاذل الشرود
واشهد انه شاعر زاكي وعقله رشيــــــد                             وكل بيت يبدعه كنه يصرف له نقود
وان دخل في الملعبه رد زايـــد قبل زيد                               واحتما الميقاف والكفو عادته الصمود
والحقيقه من يخاويه لازم يستفيـــــد                                 من تجارب قسوة الوقت لان العود عود
والجبل راسي ولاهيب ترسي كل حيد                               غير مثلك طود لاعد في الاجواد طود
ومن نشدتي عنك بقول ( مسفر بن سعيد)                          واضح مثل الجدي ياعربين الجدود
ابن فرحان الحبابي عسى عمره مديد                               مسندي واليا نخيته يقول اطلع سنود
والثنا والمجد ماياصله غير المجيــــــد                               والمراجل من مغانم قوين العضـــــود
وماروى بالدلو ياكود من حبله جويد                                واعرف هداج عد فرق بين العــــــدود
واحمد الله واشكره دايماً شبحي بعيد                             وامدحك ماني ببي شي ياشبل الاسود
غير خوة كاسب الطيب عندي يوم عيد                             والله يمدك بخيره وجعلك في الوجود


الشاعر / عايض بن مناحي بن لشدق بن شري 

ابيات من قصيدة للشاعر الكبير / حمد بن هادي المسردي القحطاني
يذكر فيها المفاخر والمكارم اللتي يقوم بها الشيخ / مسفر بن سعيد بن فرحان الحبابي


يامسفر ابن سعيد جعل الردي يفداك           ويفداك من لايرتكي للمواجيبي
عسانا الى جينا البلد دائماً نلقاك               على خير ياشوق البني الرعابيبي
أنا بشهد انه ماخسر شايباً وصاك             موصيك ذيباً وانت ذيب ولد ذيبي
كسبت الكرم والجود يامسفر بيمناك           رقيت بمعالي شامخات المهاضيبي
سوات الرجال اللي رقوا مثلك وثرواك          مايفرق مقامك من مقام المناصيبي
على الطيب لابار الردي راسياً مبناك          كم اعد من طيبك لاباروا الاصاحيبي
على المجد راسك عالي و عالياً مجناك        شيوخ الحباب أهل السيوف المحاديبي
بعدها لاسلت من الخبر  والعلوم عفاك       يامسفر مااعرف وين المقادير ترميبي
وراء هرج خلان السعاوي هذاك وذاك       ابي الزود واثر عيونهم في وسط جيبي
يامسفر بن سعيد جعل الردي يفداك         ويفداك من لايرتكـــــي للمواجيبـــــي

الشاعر/ حمد بن هادي المسردي

هذة القصيدة مهداه الى الأخ العزيز / مسفربن سعيد بن فرحان القحطاني بمناسبة ترشيحه عضوا في مجالس البلدية


بسم ربي عالــــم السر غفـــار الذنــــــوب              لاإله إلا هـــــو أبدا بذكره واستعين
بعد ذكــــره عد منشئ من المنشي نصوب              مرحباً ترحيبة لـــرجال الحاضريــن
مرحباً ترحيب باللي لفوا من كل صــــــــوب             مرحباً تنقـــال ذلحين ولابعد حيـــن
في محل يرفع الـــراس والهــرج امحســــوب            مانقول الا كــلام الصـراحه واليقين
في محل ابو سعيــــــــد ابن عم اللي ونـــوب           قال قلها قلت باقولها سمن وسميـــن
باتقــــــــدم بالتراحــــــيب والشـــٓعر العذوب            والكلام اللي مايهزع يسار ولايمين
والله ان الطـــــــــــيب بين الرجاجيل امحبوب           والتلاحم والتكاتف كما الكنز الثمين
والرجال اللي ليـــا قامت تســـد الوجـــــوب            معرفتهم عز والله يعز الطـــــــــــيبين
والصعيبه حلها اللي يحـــٓـلون الكـــــــٓــروب            في المواقيـف الصعيبه لهم فعلاً يبين
وكل صوتً قبل يسمع ويرفع في الحسوب              واحـــد اليـــا زيد واحــد نتيجتها اثنين
يعني الدعوى تنـــافس وغالب ومغــــــلوب               ومن معه ربعة ينافس وله ضلعً متين
لابتي قحطــــان من نجد لحد الجنـــٓـــوب               عزوتي قحطان عند الملاقى صاملين
والقبيلــــــــه من عبيده قويين القلــــــوب                 حدنـــا من جــٓاش للطور ربعي نازلين
والقبايل كلهم يوم حـــــارب ومحــــــروب                 كل مستوفي ولاعاد بــــه ذا ليل دين
وانتهت واســــال ربي يغفر لنـــٓـا الذنوب                ابتديبه واشكره وانتهى به واستعيـــن



الشاعر/ فايز بن حسن آل جابر القحطاني 

                                             بسم الله الرحمن الرحيم


هذه القصيدة قالها الشيخ الشاعر/ مسفر بن سعيد بن فرحان الحبابي في سعادة الأستاذ / فهد بن محمد الهماش آل سعد
وقد أحب ان يستغل الفرصة لكي يقدم هذه الأبيات ممزوجه باعذب عبارات التهنئه واحلى التبريكات
 بمناسبة زواج الشاب / محمد بن فهد الهماش على كريمة الشيخ / شديد بن محمد الهماش آل سعد

في يوم من الأيام كان هناك ذكر طيب للشيخ / فهد بن محمد الهماش وعند مامرت السالفه على المحرر الصحفي / راشد بن جعيثن هاجت مشاعره بهذه الأبيات فقال مثنياً على الهماش :

مجنون طيباً والمراجل قنـــــــــاده                مطنوخ والمطنـــــوخ من روس قحطــــان
طيباً لحافً له وطيباً وســـــــــاده               سلايل الكرمــــــــان ذريبن الايمــــــــــــان
قوماً لهم في عايز الطيب عـــــاده              عندي على ذلك شهـــوداً وبــــــرهـــــــــان

ثم سمعها الشاعر / مسفر بن سعيد بن فرحان فجاراه بهذه الأبيـــات :

على المعالي المجد يسرج جـــــواده              مع هل الطاله حريصــــــِين الأذهــــان
يصمدًعلى حر النــــــهار وبـــــراده               يصبر للأهوال أن قسى الوقت وأن لان
واللاش عيــــنه مثل عين الجــــراده               لاكاسبــــــاً فيداً ولاقاضيـــــاً شـــــــان
على حيـــــاض الجـــــم تقبل وراده                يشرب ويروي كل من كــــان عطـــشان
جوف اصحنه خمسة كباشي عواده                ويحط بالــــــــصينيه اثنيــــن قعــــدان
سوق الدبش لاطب بــٓه ياهجـــــــداه                 يشري غـــــوالي المال ماهوب منـــــــان
أقــــبل على مال المربي نفـــــــــــاده                 كن في طــــرف بيتــــه قصاصيب عمان
مثـــل الأســـد مــايهتني في رقـــاده              أو مثل ماعـــــــاف الكرى الذيب سرحـــان
يازيد نور الصبح يجلــــى ســــــواده               والصدق مايخفــــى على طول الأزمــــــــان
أشهد وغيري من يزكي الشهـــــــــاده               تهرج بها الورقــــــاء على خضر الأغصــــان

هذه القصيدة اقولها عندما اتصلت بجوال الشيخ مسفر بن سعيد ولقيته في باكستان وعبرت بهذه الابيات





ياالــه الكون يامجري الدم في الوريــــد             ياعظيم الشان ياواحداً مرجي سواه
يالله انك تـــحفظ الشيــــخ ولــداره يعيـــد            سالم وغانم ومن كل شراً اتحمـــاه
ودي اسمع لك صدى صوت يامسفر سعيد          مثلك وشرواك وافي ويلزمـــني وفـــاه
والله اللي يظـــهر الشمس واليوم الجديــــد         ان عزيـــز النفس مثلــك علي يفرض غلاه
ياولد له من له بالأمجاد تـــاريخ ورصـــيد           من رجالً خصمهم في اللقـــاء تقصر خطاه
من بني عباد سقم العـــدو ضد الضديد            مزبـــــن اللي كثروا اخصامه وقتــه حـــداه
لاحتما الميقاف واشـــتد في اليـــوم الشــديد      وقفو المـــوقف الصعــــب يذكـــر من حمــــاه
حاضراً يرفع به الراس والمـــاضي المجيــــد       في السطر لول كتبــــه الزمــــــــان ولامحـــــاه
كا ماجف النهر قلت لــــه هل من مزيــــــد        بالقــــراح اللي لاذاقــــه ضمي يقطع ضمــــاه
ممدح الا مثـــل مسفر وصوغ به الفريـــــد       من بيـــــوت الشعـــــر والكل طرقــــن مبتغــــاه
كفه اليـــا مدة النــــــاس مامـــــدت زهيـــــد     ايتعلم مـــنه الفقــــر ويش معنــــا الغنـــــاه
والشجاعه ورث جــــدان والمسعــــى حميــــد    راس قوم ولـــــه مع اهــــل الوفـــا وجــه وجـــاه
سيف هنداً حده الــــى هوا قص الحديــــد       ضربتــــه ثنتـــين يمـــا عطـــب ولا وفــــاه
ورايـــه وشوره الى شحت الأريـــــا سديــــد     عارفاً ماهو بينشـــــب لســــانه في جمــــاه
امدحه تقديـــر وعجاب والشي الأكيــــــــــد     لن مثل كفـــو في كــــل دربـــــــاً لامــــــداه


الشاعر / محمد بن حمد بن هتفر 

                                         رمـــز الكرامــــة ســــاس الرجولـــة
هذه القصيدة مهداه إلى الشيخ / مسفر بن سعيد بن فرحان ال العبد الحبابي القحطاني



من هجوس الشاعر اللي يكتب الشعر ويقوله                   يسبح بحور المعاني وان بغا الدره لقائها
عارف بحر القصيد وسابحن عرضه وطولــــه                    قمت اجاوب مع حمام الورق واغني غناها
صحت للهاجس مع الأفكار ثم جتني عجوله                     كل منها في مهمة والمعـــاني في ســـراهـا
مثل همام الغمــــام اللي يفرحنـــا هطـــوله                      البروق تلوح وان عـــرض على الديره سقاها
ياسلام الله على رمـــز الكرم ســاس الرجوله                   الشجاع اللي جمع كل المراجل واحتـــواهـــا
المراجل مـــاتجي اللي يبيهــا باسهـــولـــه                     منهو اللي طب في سوق المراجـــل وشتراهـــا
الكريم اللي على درب الوفـــاء يسرج خيوله                    عاليٍ صيتـــه وله نفـــس رفيع مستـــواهــــــــٓــا
قارنٍ قـــولــــه بفــعله قارنٍ فعـــله بقـــوله                        شيخ  من ســـاس الشيوخ ولانطــــق كلمة حمــاها
راعي الفـــعل المسمــا ماحدن يجحد فعـــوله                   مسفر بن سعيد له وقفــــه ولاحـــين نســــاهــــــا
مسفر بن سعيد له فالمرجله صولـــه وجولــــه                   بيض الله وجه من رام المــراجـــل ليــٓن جـــاهـــٓا
اشهد انه دولــــة للطيب كـــان الطيب دولـــه                  والقصيدة منتهاها مقتبــــْـس مــْن مبتداهـــــٓا
الجـــبل مـــحدن يهزه والسمـــا ماحدن يطوله                والسفينة في بحرها والكواكب في سمــــاهــــا




للشاعر/ عبدالله بن صنعا العاطفي

هذة القصيدة من الشاعر/ ظافر بن عبدالله الحلاف يسندها على الأخ / مسفر بن سعيد بن فرحان آل العبد لحيث انه رجل النخوه والذخر والفخر.






ياراكب اللي شغله قبل الأذان               فيكس آر لندكروزر أبو حزامي
من منطقة الأمواه شغله يافلان              نصه شجاعن ليهرج باحترامي
نصه لمنهو يكرم ضيوفه الضآن             غمرن على العليا يقود الزمامي
نصه لمسفر بن سعيد بن فرحان           غمر على الطاله سريع ولامـــــي
تاريخ ربعه من على عصر وقدان          عاداتهم للجود لاجاء الزحامــــي
وسلم عليـــه عداد ما هـــــــل ودان        وبلــغ تحياتي له وبالسلامـــــي
تلقا الشجاع الصيرمي طير حاران        ونعماً بابن فرحان لاجاء الكلامي
نعمن به وربعه هل الطيب كرمـــٓان         خويهم والجـــــار ماهو يضامي
قله ترا ظافر من الوقت طفـــــــران         يشكي عليك الوقت يابن الكرامي
يشكي عليـــك أنك خبير وفهمـــان        وأخوه يبغا النقل دايم دوامــــــــي
يبغى بلد شيبانه ومن له اخــــوان        عسير يامشكاي فيها مقــــامـــــي
ياابو سعيد اليوم ترا مالي أعوان        الا الله ثم أنت الرفيق المحـــامـــــي
تمت بذكر الله وللهرج برهـــــــان         وصلاة ربي على النبي والسلامـــــي

هذه القصيدة قالها الشيخ الشاعر/ مسفر بن سعيد بن فرحان الحبابي في الشيخ /شديد بن محمد الهماش آل سعد
وقد أحب ان يستغل الفرصة لكي يقدم هذة الابيات ممزوجة باعذب عبارات التهنئه واحلى التبريكات بمناسبة زواج الشاب / محمد بن فهد الهماش على كريمة الشيخ / شديد بن محمد الهماش .






البارحة ليلي مثل ليلة العيــــــد          أزرع الآمال ومن زرعها حصدها
أرمي وبالله يركد الرمي ويصيد          في الأوله من الرمي واللي بعدها
أرمي بظني في خيار الأواليــد          اللي معاريفه مايحصئ عددهـــا
درعاً يعز الراس لاحميت الحيد          لاوقفت روس الرجال لوعدهــــــــا
أبومحمد شهرته تقطع البيــــد            مواقفه يهرج بها من شهدهـــــــا
شديد لامنــــه عدا جاك بالفيــد            كل المراجل في رصيده رصدهـــا
من هاجسً يمرق على الفكر ويعيد         خطراً على روحي تفارق جسدها
يجرني جــر الحبال المعاويـــــد             مواقعه في حالي أمر وادهــــــى
أحسب نجوم الليل وأعد وأزيـــد             أسري الا من طرف غيري رقدها
يارجلي اللي ماتجي في المناقيد            صوب الرديه ماحـــداً قد نقدهـــا
على الشفا العالي حبالي مواريد           والطامنه مــن نبهـــا ما حمدهــــا
ارقى وأوقف في مواقف الأجاويــد         دامت حبالي ماتثنت عقدهــــــــــــا
أن كانه أمهلني صدوق المواعيــــد         أكحل عيون وعين أجلي رمدهــــــــا