هذه القصيدة الغزلية من طرائف الشاعر المعروف مسفر بن سعيد بن فرحان الحبابي القحطاني



نهار العيد ساقتني الهجوس العالي المرقاب
                               منيفاً الله لايسقي مذبي به ومرقابه
حدى رجلي مذبه حديت المطلوب للطَلاب
                     خذوه القوم يقضي الثار والحظ الردي جابه
وانا مثله حصل مابقي لي صده ولامجناب
                        سعير الشوق يكوي في معاليقي بمشهابه
عذابي من عيوناً ناظرتني شبحها جذاب
                                   عيوناً للقلوب المولعه بالحب جذابه
هي اسبابي ورب البيت حط لكل شن  اسباب
                            قبل لااموت لمت اكتبوا موتي من اسبابه
ورمشً لنظرني كنه يطعني بروس حراب
                             اوقف مستصيباً مقدر اهرجله ولا جابه
غلاك امر علي لاجيت اجيك أحسب لك ألف حساب
                        رفيع الذوق تهواه النفوس وتحسب احسابه
لو اشوف المها والريم الابيض والحمام اسراب
                             ما لاديت النظر يازين لحضوره وغيابه
هوانا يالطيف الروح لو شاب الدهر ماشاب
                           تخلده الليالي البيض بارباحه ومكسابه
مصابيح التهاني تستديربحكمه الغصاب
                               وحنا مؤمنين وحكمة الرحمن غصابه
اذا قطعت حبال الوصل دونك واغلقت الابواب
                          فباب الطيبين ادخل معه واخرج مع بابه
على بيض الحقائق مايحجبون البشر بحجاب
                              ونقاض العهود الله لايبلانا بماصابه
انا صاحي واعرف لصحبة الصادق من الكذاب
                           ابيع الصحبة اللي بين يوم ويوم كذابه