مرثيه في الفقيد الراحل الشيخ/ حمود الجهيمي الحمالي القحطاني يرحمه الله تعالى.



أنشهد انه راح من جوا رجال
                   قفت عن الديره واهلها ضعونه
ريف الضعيف اللي عليه الدهر مال  
                     كم حايراً لاجاه سدد ديونه
من دون ربعه يرخص الحال والمال
                   وفاءه طول البعد ماحال دونه
ابو فهد تذهل هقاويه لاجيال
                   لاسترسلوا باقلامهم يكتبونه
غيث الفضاء العاوي لامن القسى طال
               راس الفتى العالي تشيله متونه
ياسيف شد الحال من ضيقة البال
              بين الضلوع العوج تقرع شنونه
من بعد فرقى الشيخ لانشد ولاسال
                   والحال لاتنشد عِنه وشلونه
ياكثر ماعدى على رووس الاطلال
                   لاهابوا الذلان مايوصلونه
ماكل رجال يعوض برجال
              ينشي المطر والسوق يعرف زبونه
يفنى الفتى لان قصر به الاجل وان طال
                    والطيب قصراً ماتهدم ركونه
بيت الجهيمي للرجاجيل مدهال
                 تلقاء الوجيه الغانمه يدهلونه
الشاجع اللي للصعيبات حلال
                عليه زرع القلب حتت غصونه
ياحول يادنيا لها الوان واشكال
               من ساعدته العام بكره تخونه
مرحوم ياراس عليه الثرى انهال
              من بين حيطان القبر يدفنونه
الله ييسر له تساهيل الاعمال
             في جنة الفردوس يستقبلونه
بامرك يارب البيت تجعل له ظلال
            تامر ملائكة السماء يرحمونه
عداد من صلى لربه ومن قال
                 اوادمً رب الملا يطلبونه






الشاعر مسفر بن سعيدبن فرحان الحبابي القحطاني