هذه القصيدة رداً على قصيدة وصلتني من عبدالرحمن بن مبارك بن عوير ال جميح الحبابي.





يامرحباً يامكرم الضيف والجار
                 شبل الاسود اللي رفيع خبرها
اسمع و ارى الموجز لتفصيل الاخبار
                  طرايفً عقلي وفكري سخرها
احلى يابو مسعود من در الابكار
               وبوزونها اغلى من غوالي دررها
ياصاحباً لابار بي الوقت مابار
             يجبر عصاي اللي زماني كسرها
لانست شمس القيض من يومه الحار
                   الله ثم هو فكني من خطرها
شبحه بعيد ومن بعيدين الانظار
                نهج الشيوخ اللي بعيداً نظرها
يمشي على جرة عزيزين الاذكار
                  اباه واجداده ماضيع جررها
روس الرجال اللي لهم ياسعد كار
             مثل الليالي البيض يعرف قمرها
من سلسة ربعي طويلين الاشبار
                    نوادر ال جميح كلً ذكرها
توطى الخطر لما صطلا الغار بالنار
            ترخص غلا الارواح والله نصرها
ترعى هوى الخلفات في نبت الاقفار
                  ترعى بهيبتهم وينبت وبرها
مني وانا منهم لا عمساً الافكار
                لما اقبلت غبرالسنين بقًشرها
ان كان يابن عمي عليك الدهر جار
                فاصبر والايام تغير صورها
ياصاح ماتمنع من الموت الاحذار
           من حيث ماجت واقفاً في نحرها
لاشانت ارضك بدل الدار بديار
              والذيب يسند الاوديه ويحدرها
من شام للعليا فلا يلحقه عار
                 الحر من عينه يميز بصرها
ياشيخ ماتصبر على الهون الاحرار
                  للعز ترحل من محل عذرها
قلته وانا اعرف مكسبي بين الاسعار
            وكل الشعوب اعرف خفايا ديرها
اشري وابيع ولااجعل القرش دينار
           من يصرف العمله قروشً خسرها
ذا نص ماعلمني الوالد البار
                مراجع المبدا سجلها شكرها
من لابة تسقي المعادين الامرار
               تاريخها عذب المواقف نشرها
يوم المذلة تحسب لطول الاعمار
              ربعي على العدوان ربي ومرها
اولاد ابن عباد لاشبت النار
                 تذكر شوايعها ويذكر خبرها
تجود من الماجود بيام الاعسار
              تلقى الحيا بوجيها من فخرها
سلم عليهم وابلغ كبار وصغار
            ودعو الكريم يصونها من شررها
يارب تجعلنا من ارفاق الاخيار
               ننهج بنهج الي الرساله نشرها
اصوم واصلي على سيد الابرار
                     يفوز من ملة محمد ذكرها

بسم الله الرحمن الرحيم



اليكم هذه القصيده الغزليه واسمها الجارفه سميت الجارفه لانه تجرف الانسان الذي يتمتع باحسايس ومشاعر.


انا البارحه يوم انتحى الليل همي زال
                      بلقيا فتاةً لي سنينً موالفها
رسمت السعادة مع حبيبي على الاطلال
             على السيرة اللي لعنبو من يخالفها
علشانها ياسيف هجري وصبري طال
                   ولاة امرها ماغيرت عن مواقفها
اعّيد لطلتها مثل عيد الاستقلال
                 فؤادي يحب من الشوارد عفايفها
تقول ان نحرها بارقً والجبين هلال
        ان كان الرجل يعّسف فانا من عسايفها
عيونً يجي لرموشها في الخدود ظلال
                   وجسمن تباهي به ثيابً يكيفها
ابي عيطمعوسً مالها في الجمال امثال
              يازين الكلام اللي تصيغه شفايفها
تهّزع بشقرنً مجدالتً لامالت مال
                     لحبه تغار متونها من ردايفها
فتاة يحيرني طاريها بضيقة بال
               على حبها حب الجنوب ومصايفها
ابوها شجاعً صيرمياً كريم اسبال
                      يشّيد بفخر قومً وقومً يخوفها
علشان خلي كفو العذل ياعذال
                لايمكن تطيعكم العرب في واليفها
محبة مفاريع البنّي تفني الرجال
             هواء المحصنات اللي تحير وصايفها
محبتك ياروحي وربحي و راس المال
            قصيدي خذيت من العفايف طرايفها
علي طالت ايام العنا والدروب طوال
             معرف ايش وزن ثقالها من خفايفها
ابصبر وابرجي واخر الصبر له حّلال
        ماضاق الفلك من ضيق الارض بطوايفها
ترى البعد يهجر بالضماير ويفني الحال
              ياراعي الذلول اللي توامى سفايفها
دقاق الحّيل ماهي بتصعب على المحتال
               من ادنى مسارحها راعيها يهدفها
انا ماقدر اقلط في محلً بدون رجال
           ولو ان اهله تعرف سنوعي وانا اعرفها
انا اعرف عن المخراج واعرف عن المدخال
               مثل ماتعرف اشفات سابك وظايفها
وانا فوق ظنك حاضرً والظنون جزال
                  طوال الشموخ اطمح لطلة نوايفها
تفضل وكلمني على الهاتف الجوال
            تراك الحبيب اللي لك اسراري اكشفها

ايها الاخوة السلام عليكم ورحمة الله وبركاته
اليكم هذه القصيدة الغزلية التي اسميتها (بالواقعه)


وجودي وجود اللي صوابه مالقي دواه
            على العيطموس  اللي اعدمت حالي اعدامي
هنوفً شعتني مثل شعي الشجيع اعداه
                    على المجتمع تفرق بتحطيم الارقامي
هبتني مثل غرب السواني مع المنحاه
                 اعد النجوم المرقبه في السماء السامي
حبيبً لما انه سار كنه يعد خطاه
           من اجل الحياء يوطى على روس الاقدامي
يامشكاي قل الحيل والصبر لحق اقصاه
                    وانا ارجي مقابيل الليالي والايامي
وجيه الليال وبيض الايام ماتمحاه
                   تجيني به الذكرى والاقيه باحلامي
حبيباً لما طروه اصرح مع طرياه
                  اشاهد رموش عيونه السود قدامي
سقى الله يوم يميني تسلم على يمناه
                 سلام الولع لو بالنظر يسقي الظامي
انا حالفاً ماانساك ياهايف المثناه
              مادام العيون تلّد في الشرق والشامي
هلا مرحبا حيي اتصال الغلا حياه
                  مادام التواصل بينا عشرة ارقامي
تزول الجبال وراعي الحب ماخلاه
                   وداد الحبايب قلب راعيه جزامي
يامعطي محبك داه يا زين وين دواه
                  قبل لايفوت الفوت وتجف الاقلامي
وش الفود من حبً فراق الشمل يقفاه
        مثل مكسب الشخص الشقي بين الاكرامي
دعى المدعي يارب ان تستجيب دعاه
                على كثر من كبر وصلى ومن صامي
انا بتمنى ليت كلن ينال مناه
               نحقق مقاصدنا على الدين الاسلامي
تدور السنين وراعي الحب ماينساه
                  تسابق بروق الوصل والرب قسامي
وجودي وجود اللي صوابه مالقي دواه
             على العيطموس اللي تطمطم تطمطامي

بسم الله الرحمن الرحيم
ايها الاخوة اليكم هذه القصيدة بعنوان احاسيس واسباب


ياحسرتي راحت الطيبه سفى انسافي
                    ضاع الوفاء عند ناسً مايعرفونه
العز والطيب شرهاته على الوافي
                    الشاجع  الي بني عمه يحبونه
متسلسلاً من عيون المشرب الصافي
                    حفيد قومً على الطالات يدعونه
ملفى النجايب لاجات هزال وعجافي
               من المنجم اللي بروقه تسبق امزونه
من كثر شمس الخطار وكثر الاصلافي
                   يابعد مسراحهم والليل يسرونه
نصيوا طويل الشبور مكرم اللافي
                    جاته بهم سمعته قدام ياتونه
يفرق لاصار الرجال ارباع وانصافي
                ماهوب وعلً يدف الضلع بقرونه
ولا الردي طول عمره مرقده دافي
               يصبح ويمسي بسلاله وطاعونه
عليه من الشايعات رواق ولحافي
                سربً لاجات النوايب مايعدونه
يبدأ ويفنى ماولع ليته الطافي
              راح بشبابه مشيبه يالله العونه
ورى الجبال الرواسي يهرف اهرافي
     يمشي في سد الجدار وتصرف سنونه
قلت الحقيقة ماهيب باقوال عرافي
           اجيال ابي تسمعه واجيال يقرونه
طرايفً للعنى الخافي شفى انشافي
              مثل العسل ماتغير طعمه و لونه
يازيد ماكل صرافً بصرافي
             لابار ساس البناء ماقامت ركونه
انشهد ان في الهروج سمان وضعافي
                صغاير الهرج قدر اللي يقولونه
من الغيظ كن في كنين القلب حذافي
                     يلفني لّف بنيوناً لكارونه
ياكم وكم سقت رجلي والقدم حافي
                للعز والروح للرحمن مرهونه
لاجت حمول الجمال ثقال وخفافي
            شليت حملً يكود اللي يشلونه
من كثر مااكن واخفي بين الانجافي
            انحت زرع الضمير وباح مكنونه
طول حنين الجمال وعفت ميقافي
           قلت الخبر يوم شفت الموت بعيونه
تكفون ياعزوتي يابشتي الظافي
      ياربعنا اللي ورى العارض ومن دونه
الجود بين الرجال اطماع واسلافي
          اللي زرعتوا تيدي بكره تحصدونه
انا على اجمل بيوت الشعر هدافي
                 اشيد بالمدح للي يستحقونه

بسم الله الرحمن الرحيم



هذه القصيده لها موقف خاص اسميتها (بالمنقيه)

راكب اللي من حفيزه طبعة مطبوعه
                لكزس ابيض جديد طبعته ماريه
في مصانع طوكيو صمم فريدً نوعه
                 فني يكسب مزاج العالم الفنيه
الفجاج اللي يموت الذيب فيه بجوعه
              لانجذب لاقصاه كنه طايره حربيه
الحدث في شاشته ماريهً مسموعه
       تعرف ايش يصير جوى الكورة الارضيه
في قيادة شيخ شغمومً طويلاً بوعه
             ماسك بيده انصاب العزوة الجديه
المها والريم في المرتع يعرف سنوعه
                 والمها تسعه وتسعين وميه ريميه
حشمه الي سمعته فوق القمم مرفوعه
                باعلن امجاده مع الفريس والرجليه
يجب ان اثني وقار السربة المتبوعه
               حسب اوامر دينا واحكامنا الشرعيه
من هجوسً تقفي افراد وتجي مجموعه
                    بين اكابرها وبيني خدمة جبريه
من هوى خلً خذا عقلي بزين طبوعه
             والجمال اليوسفي والرَيز والشخصيه
ترفة تملى النظر وان وقفت مربوعه
               كن جدايلها مخاييل امطر الوسميه
اه ياللي له بساتين الغلا مزروعه
                  من غرابيل الزمان وطعنة مخفية
ياحبيب الروح لاترضى علي باللوعه
                نظرتك تطعن بحد السيف والجنبيه
دامت احبال التواصل ماهي مقطوعه
                      بَارتجي واتحرى ليلة القدريه
واتمنى والتماني ماهي ممنوعه
             ليتني لش يالجمال الغيد وانتي ليه
لب جاهي وان غلطت فغلطتي مرجوعه
                    ليت امانينا تزف احلامنا الوديه
خل خفوقي في الفضاء الغايم تلج شموعه
             من بعد عيد رمضان يلوح عيد اضحيه
ياقمر كل الحلا والملح يا دلوعه
                  يا مدى كل الغلا واهدافي المبنيه
من عربنا من بلاد الرايه المرفوعه
             الاصل والمنشأ سعودي وانتي سعودية
ونتي وش يخفي الولهان بين ضلوعه
            من الشقاوة والعنى وافكاره الوهميه
النزاهه والمزى بقلوبنا مطبوعه
                    ماهي بعشرة ليال ورفقةً عاديه
الغرام اللي يبيد وينتهي باسبوعه
                   مثل برقا الريش لابيعه ولامشريه
 البحر ما كل من غاصه هبط في قْوعه
                      كود ناس بالقدر مامورةً منهيه

                            بسم الله الرحمن الرحيم

اليكم هذه القصيده من الشيخ الشاعر/مسفر بن سعيد بن فرحان ال العبد الحبابي  رداً على قصيدةً من الشاعر الكبير/حرمل بن محمد بن كليفيخ الجروي



امس الضحى الفنجان الاشقر شربناه
                          مقنداً بالهيل والزعفراني
اهلين باللي ساق يمي مطاياه
             ساق النجايب من الشرف لين جاني
بن عم اللي تكسب الجود يمناه
                  الشاجع العارف وريع السناني
طلق النظير اللي بشوشً محياه
                 الشعر في وصفه يكل اللساني
ابو محمد جعل الانذال تفداه
                     الجروي اللي له مكانً بياني
من لابتن كم عايلً تقصر خطاه
                      لما تنادى يافلان الفلاني
عاقوه صبيان الظفر من نواياه
                   عظايم تثبت عزاز المجاني
خلوه ربعه للسباع اتعشاه
              بين الجبال الشاهقه والمحاني
من طاح طاح ومن شرد جاه ماجاه
                    كنه صويبً يالله المستعاني
يشهد جنوب العمق واقصاه وادناه
          لولاد بن جاري كبار الصواني
حقايقً عنوانها الكل يقراه
            تهرج لنا بالاحداث ذاك الزماني
يوم الشعوب احراب واحزاب واعداه
              والحمدلله اليوم في امن واماني
ابن كليفيخ اوصله لاتعداه
          حرمل لامّا امتس الحقب والبطاني
يطيب راسك يا احمر العين طيباه
                  على صفاة ماتجي بالتماني
الاوله منها النبا العطر وقراه
            والوجه الابيض والهروج السماني
والثانيه تحكي بجوده نواياه
                 يرقى العلا لهاب ولد الهداني
والثالثه ياما بنى الشعر والقاه
                 للموجبه يقدم طويل اليماني
والرابعه لاقيل قلته وقلناه
              قال اترك اللي مانبي مايباني
والخامسه من حيث تبغاه تلقاه
                 راسً رفيع مايحب الطماني
مّلا عرف حده وسده وممشاه
                الايام تمحى وجهه بوجه ثاني
اللي لما ناجيت سمع المناجاة
                اوطى المخاطر لاذكرته وزاني
اشتقت يا حرمل معك بالمجاراة
                   من قبل لاياتي فوات الاواني
حنا نسوق الطيب لاهله وملفاه
              والفضل للواحد جزيل الحساني
مفاخرً بين الرجال المسماه
                 تهرج بها العربان والعمر فاني
ناخذ ونعطي في اول العمر واتلاه
                    ولا نبي قولت عطيت وعطاني
والفضل للي خاوي العقل يرفاه
                       مكارمه فينا عيانً بياني
منذو خلقنا الله طوابير وعصاه
                  حنا بني عم وربوع وعواني
الله من همً ورى الصدر واكناه
                احداه للفج الخلا ويحداني
اصبر واخفي واكتم الغيظ واكناه
           لايشمت اللي مادرى وش جاني
اظن مامثلي الصبور لما جاه
            صِبرت صَبر الفارس الغيهباني
من هاجسً بين الضلوع المحناه
                   مواقعه يمكن تهد المباني
لاجيت ابامحى جرح الايام وانساه
              جدد عناي طاري اللي طارلي
ياحالي اللي باري الهم يبراه
                تلعب به الدنيا رفاع وطماني
الحر يصبر للدهر لاتوطاه
               سود الليالي ماعليها ضماني
ياوالله اللي راحوا اصحابي عداه
                    تنكروا بالخوف بعد الاماني
اخير من قرب بعض الناس فرقاه
                  اللي بعكس لطيبتي له جزاني
لو يغبى وجه الردي مافقدناه
                ايش الفوايد من قليل الحساني
ياعنك يابو زيد ماني بوياه
                  يلقى السمايم والاله يحماني
ماينحدر سيلً مع غير مجراه
              من حكمة الله لكل شيً مكاني
كم من صبيً تذكر الناس بلواه
                 كلً يقول فلان جاه الجناني
ماينبني بيتاً على غير مبناه
            واعزاز الانفس ماتحب الهواني
لاتاخذ ايام الدهر بالمداره
             تبغى الحقايق والدهر قلباني
عن الذياب الشهب تمشي مع الشاه
            على مدى ايام وليالي الزماني
قال المثل من جاك بالعلم وداه
       فوق الذلول او فوق سرج الحصاني
ياكاتب اكتب والمخاليق تقراه
                  عليك تكتب والكتابه تباني
يالله ياللي ندحم الضد باسماه
             يامالكً سبع السموات الرزاني
ياللي لعبده كاتبً داه ودواه
          كم من صحيح وكم مريض يعاني
تكتب لنا التوفيق والوجه والجاه
             من حيث ماقدنا الجنوب المتاني
يامعطي الوجه الرضي ماتمناه
              لما استعانك قبل قاصي وداني
يارب لـ قلت اه ثم اه ثم اه
                 انك تعوضني نعيم الجناني
صلوا على عبده رسوله ومسعاه
             وجه الرسول اللي هداك وهداني

بسم الله الرحمن الرحيم


ايها الاخوة اليكم هذه القصيدة الغزلية الممزوجه بالشواهد الدولية .


سلم على صاحبي لقدك سراحي
                 متوجهً للشــــــــمال ونيتك نيــــه
مجمولتن زينها في البيض فضاحي
                من شافها قال هذا وصف حوريه
جبينها بارقً في الليل لماحي
                 واحساسها كل ابوها دايمً حيه
على بنات الجزيره تلبس وشاحي
            احتلت الزين في الأرض السعودية
مزيونة من كسبَها حاش الأرباحي
             في البورصة بين الأسواق التجارية
يبدو لي اني بعدها ماني بصاحي
             افز فزة قريــصً لادغــــه حيـــه
قلبي عليها يسابق شقر الاجناحي
                   محرمً البنات البيض مُوليه
في بعدها ضامري ماهوب مرتاحي
            والقرب منها دواء الروح الشقاويه
انا اشهد ان الهوى والحب ذباحي
                 غريزةً في الرجاجيل الشقرديه
من ضيقة البال صدري بالشعر فاحي
                  تبـــغى عربيـــةً ولا انقليزيـــه
انا اعتبر حبها قفلي ومفتاحي
                وَهبه من امِدير الافلاك الآلهيه
حازت على جايزة نوبل بالافراحي
              يوم لقبوه ابطل الدولة السويديه
كن وجهها في ظلام الليل مصباحي
              وعيونها السود مثل ظلالة الفيه
ومجدلاتً سوات الليل لطاحي
               متثنياتً على الأرادف كم ليه
ان قرب الشوف وان بعدت الاشباحي
          يا محلا الريم في الارض الخلاويه
مغير بشتي وجوالي ومسباحي
        واللكزس اللي خذا الميزات حصريه
والمرتبه فوقها الدربيل وسلاحي
              صناعة الروس والفرخ العدنية

ايها الاخوة اليكم هذه القصيده الغزليه للشيخ الشاعر/مسفر بن سعيد بن فرحان الحبابي
بعنوان (البارجه )


ياحلو لامريتنا مثل العرب رد السلام
                 يافتنة الريان مايفنى الرجال الا الحريم
اخاف يلحقني علشانك مشاريه وملام
              طوارياً بين المحاني ترخص الوجه الحشيم
بين الطوايف فارقن بالزين في شرقً وشام
            محاسن تزهاك بين البيض بسم الله الرحيم
يارب عطني من حلالك واكفني شر الحرام
          ياسامع الدعوات يا رحمن ذو العرش العظيم
لما طرى لي زامي الردفين معسول الكلام
        تغدي بي الذكرى غروب الشمس لهّب النسيم
غضً غضيضً  ينهزع ماكن في جسمه     عظام
            لغظى وسلهم بالنظر عطفك وعفوك ياكريم
قولوله ان طيفه يواصلني تحيه واحترام
         اعطوه علمي واخبري والعلم مايخفى العليم
هجر الزمان يمرنا يازين عاماً بعد عام
          لما صفت الانواء وجِدينا ظهر في الجو غيم
اتابع الونات طول الليل والعالم نيام
          وردتني ياصاحبي على الصراط المستقيم
قَسمتي المعلوق ياشمس المحبين انقسام
        عطيتك اللي في يدي والحل في يدك ياعديم
ياصاحبي عطني مواثيق واعهودً والتزام
         حقايقً  برهانها يوفي الخصيم من الخصيم
واثبت لك ان حبك ومقدارك على صدري وسام
             مهما تباعدنا غلانا في الضماير مستديم
واللي يبور بصاحبه منا له ثياب الملام
         مايجحد الميقاف ويحجب الصحيح الا الغشيم
اللي مايدري ايش الوفاء عِرفه يباع ولايسام
                 على خصوصيات خلق الله شيطانً رجيم
مايدري ان اهل الغلا بين العرب كنهم صيام
               من الحياء والصمت كنهم بين زمزم والحطيم