الايام شابت وّشبنا والدهرشايب

الربع راحوا جنوب وخلوا الشايب= وانا احسب انهم لاراحوا مايخلونه

وانا لما جاء اللزوم الواجب الصايب=انشد وتلاقاني اول من ينادونه

علماً يِعلم به الحاضر عن الغايب=ياربعنا اللي وراء العارض ومن دونه

مايجحد الصدق والماقف كن العايب=والكذب لارحموا ابو ناساً يحبونه

يوم بركت طيب ولاماهو بطايب=بعض البعارين عضت متنه سنونه

في حضرة ابن دليم مٌورد الهايب=فهد لاعّل آل ابو وجهين يفدونه

شيخ المشاييخ شيخ الشيخ والنايب= اللي كبار الحضر والبدو ينصونه

عزوة قروم الرجال ومشبع السايب= من اظلم الكون في عينه قضى شونه

من شعر شاعر كليب وشعر ابن ثايب=اهداك فكري ثمان ابيات مازونه

الايام شابت وشبنا والدهر شايب=ذروة سنام الكلام اللي تقولونه

من كثر ماشفت فكري والجسد ذايب=شفته ومثلى ارجالاً يشوفونه

والله ماعاد نعرف ويش الدهر جايب= وضع العرب كل يوماً يختلف لونه

يامروبين ازرق الماء ماهو برايب=الصدق من الكذب يكرم لاتخلطونه

عوامل الوقت ياللي من الدهر تايب= سادة جماهير الارجنتي مارادونه

من هموم البال سخرت الطرايف=شرداً البال يعشقها عشاقه

في سماها اعلنت للهاجس وظايف=فاتحاً بين الظلوع العوج طاقه

يردف الهجمات غارات ونكايف=تذهل المعلوق وتضيق خناقه

من وقوعه صارت ضلوعي نحايف= كل ماناموا العباد اسرج براقه

ساقني كما يسوق الفيد حايف= بعد فرقاء صاحباً مابغي فراقه

كيف بسلى بعد فرقاء ماي وايف=الله وكبر ياللياقة والرشاقة

في اليمن والشام كاملة الوصايف=بالعيون السود تسرقني سراقة

اشهد اني من العيون السود خايف=عين حراً للهداد اٌطلق سباقة

كن بياض خدودها بيض الصحايف=والجسد لاهو متين ولادقاقة

ياحسايف ياحسايف ياحسايف=صفنا يازين جاء فيه انشقاقه

اتذكر قولتي لش ماي لايف=بين سحر الليل والهرج الرقاقه

عشرة المعروف مافيها كلايف=يستريح البال ويزيد اشتياقه

والقلوب اللي من الفرقاء عجايف= ماتحقق من الامال الاشفاقة

فرقونا اقشر مفرقة الولايف =شالوا اسمك من الجواز ومن البطاقة

زمرة لابليس واعوانه عسايف=يستبيحون الجزالة بالدقاقة

جعلهم ياأمة محمد بالتلايف=ويش مصلوح المنافق من نفاقه

والله اني من بعض الاصحاب عايف=لو هووني ماربطت بهم علاقة

الجروح الهيم نضمدها صفايف=ياهل الراي المخالف بالطقاقة

اذلفوا عنا عساكم بالذلايف=يامعكرة المودة والصداقة

مارقيتوا بالكذب روس النوايف=لابنيوا بيت هديتوا رواقه

مادرينا انكم لاوايلنا عرايف=لين شفنا في سماء الدنيا زراقة

ياعواذل كيفوا والكيف كايف=كل قدراً ياعذولي له طباقه

يم وجيه البيد رايحتاً كسايف=ماغفل قلب العراقي عن عراقه

كيف بنسى حب زاميت الردايف=مابقى الا ايام ذكراها شفاقه

راحت الفرحة مع ايام المصايف= في الفضاء الغايم تصاحبنا الاناقة

لاطرت للبال سخرت الطرايف=سلسبيل خذت من ماها ذواقه

اقتطف ماء الورد والكادي قطايف= من زهور الورد صاغ الفكر باقة

من الولع كني على جرفاُ مهايف=كمل حالي والخوي قطاع ساقة

اردف الونات لما هب طايف=ونت اللي فاقداً اغلى نياقه

ونت اللي من سهوم الموت خايف=سيق مايعرف قصاصة من عتاقه

ونت اللي ضده سلالاً رهايف=بين عدوانه كسر من عظم ساقه

نحترص للعز وانفسنا عفايف=لاصدفنا من عناء الايام عاقه

لاهجدنا القوم بددنا الحفايف=مانفكر في الغراب وفي نعاقة

ياحمول الجيش موميت السفايف=راس عنتر سيق لامواس الحلاقة

حن عرب مانطرق الباب المسايف=وان عطشنا ماشربنا الا بفاقة

ماخذانا هرج معسول الشفايف=مايحال الماء السراب الا براقة

مادرينا يازمن ويش انت شايف=العيون العمي ساقتنا سياقه

لاتمس الحبل والدعوى خفايف=والحضارم مايخلون الحماقه

مابقى الا ادعي على الله الخلايف=عوظني واحشر مقاريد الرفاقة

يازين لاتشغل البال أن غبت وأن رحت وأن جيت
أن غبت كم عاشق غاب الأيام ماجت على الكيف

للصدق مدخل ومخراج والكذب مايبني البيت
لاصار صادق وكذاب سقنا النجايب مناكيف

كثر التعب ينفذ الحال وأنا تعبت وتوذيت
يالطيب الوقت ماطاب برد الشتاء بعده الصيف

وش جاك ياطيب الفال اللي بنيت أمس هديت
أباأنشدك ويش الاسباب يوم يجلسون المواقيف

وينك لك ايام وليال وش جبت وايش انت وديت
ياناهي الحظ غصاب بارت بايديك المجاديف

ترى الجزاء حسب الاعمال ياللي برايك تغانيت
الشرع دستور الاعراب والعدل اخير التصاريف

الحب يازين قتال يدعي البكاء والتناهيت
يحكم وتخضع له اشناب ماذلها الرمح والسيف

عجم السلاسل والاقفال ليت الهوى مثلها ليت
الحب قيلون الاعصاب يشابهه بالتواصيف

ليتك تمر وترى الحال ويش اخذت وايش انت بقيت
قربك دواء كل الاسباب لبعدك اخشى الصواديف

بزهمك ياعم ياخال ماشربت معك وتقهويت
تراي للكيف شراب وانت المعزب وانا الضيف

ياصاحبي كمل الحال وأنا معك ماتهنيت
يازين شاب الوعد شاب زل الشتاء وأقبل الصيف

ترى الهوى ألوان وأشكال في بحره أخذت وأعطيت
لاقلت جرح الهوى طاب جاء في سمانا عواصيف

من البيض لاأنشد ولاسال الى الاطروك ونيت
ذكراك ترهبني إرهاب جويّ غيوم وعواصيف

ماشاقني كثر الأزوال أصيب وأرمي بتوقيت
أعرف وش حقوق الأصحاب والله منسى المعاريف

ماطعت بك حكي عذال مفرحين الشماميت
أغليك والحب غلاب بأفكاري أعطيك توصيف

لاينقطع خط الأرسال أسمع كلامك لارديت
حبل الوصل بين الأحباب يحيي القلوب المواليف

يارب تحقيق الآمال تسمع دعايه لاصليت
أن يجتمع شمل الاحباب بين النجوم المشاريف

غندورةً مالها أمثال مهاة ريم لاحليت
رحمتك يارب الارباب تضيع فيها التواصيف

جبينها كنه هلال نور القمر يحجب الليت
يوم كل نجماً بدا غاب عن كيف نور القمر كيف

نجلاءً هدبها له ظلال والصدر الأبيض كما الليت
حازت على كل الأعجاب في مصر والشام وجنيف

ياكم خضع راس رجال قبيليً شاع له صيت
للحب والحب غلاب لون دروبه عجاريف

ترا الهوى الوان وأشكال في بحره أخذت وأعطيت
لاقلت جرح الهوى طاب جاء في سمانا عواصيف

بنات فكري والاقوال وبيوت شعري لاغنيت
ابدي بها كل مرقاب بالنايفات المشاعيف